老厝邊

Open Now

Now Closed

佐敦人氣台式餐廳，主打多款性價比高嘅台灣美食，經典飯麵、夜市小食、特色飲品樣樣有齊，就連個名都充滿台灣風味，依家港九新界都有分店，鍾意食台灣菜嘅唔好錯過～ 夏日之選有三絲麻醬涼麵，混合青瓜、雞蛋絲同火腿，麵條軟硬度適中，冰冰涼涼，混合邪惡麻醬，十分開胃，建議可以額外添加醬汁，雖然好肥但食落真係好過癮🤣私心推介三杯雞排蔥油拌麵，麵條同涼麵大同小異，相比起會更黏同鹹，上面放上兩大塊雞，肉質嫩滑可口，啖啖肉，外皮夠香，份量十足，值得一試。飯類有香噴噴炸雞排大碗公，包含粟米、芽菜、蛋同少量蔬菜。炸雞切開為四大件，外層炸至酥脆，肉質同樣嫩，味道調得唔錯，唔會死鹹但又有少少香氣，唔夠食嘅可以選擇多飯。小食方面要咗個香酥炸排骨，大件夾抵食，炸法同雞一樣，只不過換咗款肉，調味亦係一樣，感覺比較重複，下次會叫其他款色試試。