金泰園 (Closed)

呢日去屯門搵個好朋友，晚飯時間一行二人嚟到呢間位於H.A.N.D.S.地下嘅金泰園食晚飯。餐廳裝修以藍色及木色為主調，靚得嚟又好舒服。見到餐牌上邊嘅豐盛美食二人餐只係$288咁抵，一於叫嚟試下。泰式酸辣鳳爪 - 都有幾多嚿鳳爪，爽口嘅鳳爪配上新鮮嘅洋蔥絲、紅蘿蔔絲、中芹，生菜……等等，味道酸酸辣辣，既清新又開胃。馬拉盞炒通菜 - 大大碟，通菜夠幼，炒得香口好食。泰式咖喱大蝦 - 咖喱汁香滑惹味，入邊有兩隻大蝦，大蝦有先走油處理，所以十分香口。咖喱汁入邊仲加有爽口嘅青椒、洋蔥及葱段……等，配以帶有椰香味嘅香脆蒜茸包，整道菜味道同口感都豐富好食。泰特色海南雞 - 十分嫩滑，配上酸酸辣辣嘅惹味醬汁，忍唔住食完一嚿接一嚿。泰式蝦頭油炒飯 - 十分香口，飯身炒得粒粒分明，飯入面仲有爽口大蝦，好食又飽肚。泰式精美甜品 - 味道清甜口感爽脆。椰汁冰 / 椰汁紅豆冰 - 跟餐仲包兩杯泰式飲品。呢個餐有五個菜式，再加上甜品及飲品，兩個人食飽飽，都只係$288，真係相當抵食！