圓老爺雞煲小廚 (Closed)

今日喺元朗呢邊做野，放工約埋朋友食飯，佢就帶左我黎呢度。呢度配搭幾特別，有剩雞煲食，唔係食完打邊爐o個種，唔使擔心熱氣，另外有唔同種類嘅小菜。雞煲可以揀醬皇鮮味或者麻辣重慶，半隻或一隻。我地叫左醬皇鮮味雞煲(半隻)，唔食得太辣又心思思想試下辣，店員好細心咁俾埋個秘製辣醬我地。雞煲連埋gas爐一齊上，咁上下時間店員就過黎將所有材料炒炒炒，一熟就可以開蓋食。時間控制得好，雞件非常香滑，惹味之餘唔會勁重味精，洋蔥好甜，加埋紅蔥同莞茜令成個雞煲味道昇華，辣醬味道都好豐富，少少咁點下幾岩我地，但加埋一齊相信我會覺得太辣。椒鹽鮮魷份量幾多，魷魚一d都唔鞋，炸粉唔會太厚，香濃椒鹽味點埋個酸汁真係一舊又一舊食唔停。金銀蛋莧菜湯底清甜，口感岩岩好唔會過淋。價錢實惠，7點開始坐無虛席。題外話，老闆圓老爺同招牌上面嘅卡通圓老爺幾似樣喎，哈哈。