M3 Italian (Closed)

老公生日，請咗一日假一齊輕鬆下，午餐嚟咗呢度M3食享受二人世界。叫咗兩個午餐，可選餐湯或沙律，是日餐湯係忌廉粟米湯，沙律係田園沙律，除咗菜仲有蕎頭、車厘茄、小柑，加埋啲酸味味嘅沙律醬， 十分清新開胃。主菜有香草忌廉煙三文魚意大利飯（ $66），將兩塊幾大嘅煙三文魚卷埋一齊變咗個花放喺中間，擺得靚靚，個汁相當creamy好味，飯入面仲有三文魚碎、車厘茄、黃色好似翠玉瓜質地嘅瓜，食得津津有味！另一個主菜係香煎紐西蘭鱈魚柳伴煙肉四季豆及熱情果忌廉汁（$73），有兩大塊魚柳，厚身咬落有口感，而且煎得香脆，幾鍾意佢呢個熱情果忌廉汁，甜甜地，很特別，平時好少遇到。意粉唔知係咪叫Al dente,係剛好帶點可接受的硬度。估唔到係呢個位置，已經唔係旺區，但lunch後來係坐滿人的，之前人地推介食晚餐，見佢夜晚有蠔，有機會來試下，相信晚上更具情調。