泰邊爐 (Closed)

今日朋友約食飯，攪攪新意思，打個泰式邊爐。我心諗，乜邊爐都有分泰唔泰式o架咩？哈哈，原來真係有，仲要係火鍋任食。呢間火鍋店一入去就好有泰國風情，泰國大象，用深藍色主調既裝潢都好有氣氛。黎得當然要食佢個海鮮餐啦，亦叫咗佢主打嘅冬陰公湯底。等上菜同時我都出去拎番唔同嘅醬料，款式好多亦都有一啲係泰式嘅醬料，咁我都要試下啦！啲野好快就到，一上菜就聞到好香既冬陰公味道，亦都有好多款嘅海鮮已經放係枱面，最吸引嘅就係有鮑魚同埋帶子，果然一試就知係新鮮貨，鮮甜肉厚，蠔同青口都一樣鮮甜。不過美中不足就係蝦同魚喇，佢地就稍微唔夠新鮮，可能放耐咗啦。食過海鮮，當然要試下肉類，主打嘅安格斯牛肉果然無失望，夠肉味，肥瘦舒中，不過羊肉就有羶味，可能我唔太好羊肉啦。仲有就係菜籃都唔錯，可以係海鮮肉類中間拎返個平衡。加上出面可以拎嘅炸魚皮真係好鬆化，我同朋友唔覺唔覺都番食咗兩次。其實食晒個餐都已經勁飽，已經叫唔到第二round, 加上佢酒水任飲，仲要有好多泰式甜品任食，真係飽到不得了。總括黎講，呢個價錢真係好抵食，我下次要留力再戰。