阿來東南亞風味 (Closed)

限聚令下真係少左同朋友出街，近日疫情好轉，終於可以約下朋友啦。疫情下無得去旅行，喜愛食泰國菜嘅我，唯有係香港搵好野食。位於廣華街嘅「阿來東南亞風味」，交通方便，係約朋友食飯嘅好地方。由於我地只有兩個人，所以只係叫左一d小食同埋一個主菜share。泰式炸蝦餅：炸蝦餅係我最欣賞既小食，一碟總共有六件，以＄68黎講算係好超值。蝦餅炸得剛剛好，外層金黃夠脆，入口爽口彈牙，口感十足，鮮蝦味道夠重，再配埋D泰式辣醬食，真係風味十足。金柚子鮮蝦沙律：泰菜味道普遍偏濃，叫返個沙律食就最好不過。加入左柚子同蝦既沙律，配埋泰式沙律汁，味道清新，令人越食越開胃。馬拉盞炒椰菜苗：椰菜苗炒煮時火候剛剛好，軟硬適中，加入馬拉盞炒，鹹味恰到好處，食落好有口感。青咖喱雞配薄餅：加左椰汁整成既青咖喱雞真係份外香，入口一d都唔辣，鍾意食辣既我認為可以再辣少少，配料方面，除左有雞肉之外仲有豆角，份量亦都好多。有別於平時配飯，呢度係配薄餅，一份有8小件，可以用黎點剩餘嘅咖喱汁，簡直係一流呀。埋單都係每人＄140 左右，咁嘅價錢食到呢個水準嘅食物，都算係「性價比高」啦。