撈得喜火鍋冰室

Open Now

Now Closed

突然之間天氣又凍返，臨時出咗去打邊爐！呢間火鍋店上次喺附近食飯已經見到，平日晚市人潮都幾多~價錢亦都好平可以任飲任食兩個鐘~湯底都有好多唔同選擇，烤魚、雞煲等都可以選擇。飲品櫃選擇都算多，除咗基本罐裝嘢飲連啤酒都有，另外亦有餐廳手打檸檬茶、白桃烏龍等。湯底我哋揀咗清甜椰子雞煲，一共有半隻雞，見出面仲有雞件可以拎，所以夠唒食！湯底原汁原味，用咗三個椰子去製作，加埋粟米、紅蘿蔔同馬蹄煲更加清甜。忍唔住飲咗兩碗湯，加入寬粉打邊爐吸唒啲椰子味好好食~~自助區火鍋配料選擇多，除咗基本嘅丸類菜類，亦有少啲喺放題見到嘅鮮鴨血、蜆同蟶子。蜆冇沙好鮮甜，蟶子亦都好甜同爽口。肉類有手切鮮牛、肥牛、牛板腱以及黑毛豬，全部都係喺出面雪櫃自己拎~店內亦有雪糕及甜品任食 ，甚至有棉花糖機可以自己整棉花糖！總括嚟講，呢個價錢可以食到有海鮮嘅放題真係好抵！性價比高！