風雲丸

Open Now

Now Closed

一早已經聽過風雲丸個名，可惜抽唔到時間同朋友過海去食。早前知道佢係尖沙咀開分店仲要係K-11咁近，所以一收工就跟同事過黎拜訪一番。因為都排左一陣隊，所以餓餓地就一齊點左特盛(400G)，麵量都頗多。期間限定：特濃山椒魚乾沾麵。上枱時滾燙非常，帶出魚湯誘人香味。旁邊附上一片檸檬，可以根據口味自行調整湯嘅濃淡味道。輕輕加一兩滴就啱啱好，因為沾湯本身都真係幾湯。燒肉超厚同大塊，可以當佢豬扒咁睇都無問題。肥瘦均勻，入口油香四溢之餘又好鬆化，配上魚介沾麵增加味道，好好食。可惜麵身唔算特別，如果用上曲身粗麵，就更能掛上湯汁增添風味。附贈嘅魚乾幾香口，遲左放湯有啲硬，最好係一開始放落沾湯裡面軟化及出味。辛辣豚骨魚介沾麵。同樣係厚切燒肉，但同事嘅就肥膩左少少。湯底用上辛辣粉調味，入口較刺激，味道同山椒魚湯差不多，愛辣人士可以一嚐。日式餃子。用上少少麵粉水煎所以結左一大塊脆片。餃子唔算大隻主要係香口同填補沾麵嘅濃郁味道，不過不失咁啦。因為新開業關係，人流唔算太多唔會造成一食完就要轉俾下一手嘅情況，所以仲可以食完跟同事下計。整體都算唔錯，揀係吧枱坐可以一邊睇煮麵一邊食，雙重享受。