家賀屋

今日係我同老公拍拖17周年紀念日，咁嘅日子梗係要帶老公食好西啦！我哋就嚟咗家賀屋，今次就食日本菜。因為係平日，所以我哋揀咗食午餐，食 lunch set 就最抵食！我就叫咗我至愛嘅 #火炙左口群丼 ，對於左口魚群邊，我第一次食已經愛上！而定食 set 係會有麵豉湯，沙律，主食 & 蒸蛋。丼飯底係醬油撈飯，配左口魚食，每一啖都好香好好食；而蒸蛋入面就有帶子 & 蜆肉。而老公就叫咗 #關東煮烏冬配照燒慢煮雞扒，關東煮烏冬，梗係唔少得蘿蔔 (超級入味)，仲未冬菇，竹輪，仲有豆腐，呢個就係關東煮嘅精髓，照燒雞扒好夠味，配埋關東煮食，好 match！之後再叫咗 #自家燒玉子，我老公大愛燒玉子，又熱又充滿甜味的玉子，正！仲有自己屋企唔會整嘅 #明太子雞翼，日本菜必食，又係老公至愛！跟住仲有我至愛嘅 #炸軟殼蟹，配埋沙律醬食，熱辣辣正呀！最後，亦係我哋至愛同好出名嘅 #西京燒銀鱈魚，食過嘅都知呢道菜係超級美味，我哋兩個都爭住食。而飲品我哋加錢叫咗 #巨峰乳酸梳打，我係乳酸迷嚟㗎！總結：環境 100 分，好掛住日本，呢到俾我感覺好舒服，仲食到好好味嘅日本菜，下次真係可以考慮帶埋仔女嚟食。