圓老爺雞煲小廚 (Closed)

呢兩日元朗特別靜，但住元朗嘅我地冇得避，行行下有個後巷位有間小廚嘅門口吸引左我。佢係小廚，但個餐牌啲字跡同logo又好似好年輕。既然個名都寫住係雞煲，咁一定要試試佢個雞煲啦。我地啦左重慶麻辣雞煲，小辣，佢個醬較到好香，又唔太辣，但好夠味，而佢啲雞都好滑。👍🏼👍🏼👍🏼原本想嗌椒鹽九肚魚，但老細話休魚期冇得食，推介我地食鮮魷。熱辣辣上到嚟，香脆，而椒鹽已經均勻咁撒左上去，味道岩岩好。只係鮮魷似乎係冰鮮嘅，冇鮮味。另外嗌左呢個金寸骨，真心嚟到呢度真係要試，熱辣辣上到嚟又係脆卜卜，啖啖肉，好香口。男朋友話，一間小廚大排檔好唔好，嗌個小炒王試下就知。睇圖，唔洗我講都已經好吸引，佢啲韮皇好嫩，好好食好夠味。啲菜鋪魚乾魷魚蝦仁都係新鮮嘅，唔係啲擺左好耐賣唔出炒埋一碟嘅嘢。呢個小炒王絕對可以餸兩碗飯。菜方面就嗌左個金銀蛋莧菜，清清地，咸蛋好香，啲菜都好嫩。總括係呢個小廚啲嘢好新鮮，絕對可以encore。下次我想試埋佢個酸菜魚🤣。