嘉寶漢堡 (Moved) New Location

今次又食返尖沙咀店，鋪面細，連埋吧枱都唔夠20個位，門口仲企左一堆人：有啲等緊位，有啲等緊外賣；望到鋪頭入面啲人都仲等緊餐，門口又有六七個人等入，即刻放棄堂食，改叫外賣。以為外賣會快啲，點知係諗多咗。成間鋪頭得兩個員工，一個仲要負責埋收銀，佢哋係跟Order Number整嘅，一單做完先下一單，我地由126等到138號，等左差唔多1個鐘先拎到個餐。野食方面，質素寶係唔錯！黑松露芝士牛堡家姐點既，一打開個包，個包裝紙已經滿滿既油汁，好彩張紙係有啲膠膠地，如果唔係都會食得幾狼狽。試左兩啖，黑松露醬俾得幾大方，牛漢堡排頗厚身，好軟稔又多汁。蜜糖芥末菠蘿雞堡蜜糖/芥末/菠蘿/雞－－唔會有錯既組合，但相對地驚喜都唔大。菠蘿唔算厚切，口感上享受一般，但配埋個醬汁既酸甜比例好balance......雞排煎得頗香口，邊邊既雞皮仲可以食到脆脆地，但味道唔算好突出，下次再食應該會揀返牛食。薯格我地拎左餐行左一段路去到百週年紀念花園到食，但個薯格唔會俾膠袋焗到變一pats，依然都有香脆既外皮，不過食食下就覺得有啲油同熱氣喇！好彩同家姐兩個人share一份。