元朗新記 (吳松街)

Open Now

Now Closed

今晚好夜先收工，所以就打算食埋晚飯先返屋企，於是去咗老公公司附近搵食。之前未試過呢間元朗新記，見佢燈火通明，於是就入去坐低咗。以佢嘅裝修格局，再加埋喺佐敦呢個旺區，我覺得佢食物嘅定價一啲都唔貴，而且仲好多選擇。見到有好多嘢都想食，於是乎就喺餐牌每頁揀樣試吓啦！佢呢度嘅其中一款招牌菜就係雞粥，所以點都要叫番碗試吓。果然佢個雞粥真係好好味，粥底煲得非常綿滑，雞肉嫩滑而且入味，蠔仔係新鮮嘅蠔，無得彈！食粥一定要有油炸鬼，又想食腸粉，所以最好就係叫份炸両，一次過滿足晒兩個願望。呢個涼拌皮蛋超大碟，上面灑上芝麻同炸蒜粒，好香口，真係就咁食有得，要來送粥又得，得咗！呢個鮮蝦雲吞撈麵都好值得推介，佢嘅雲吞入面有好大隻鮮蝦，而且非常爽口，而佢嘅麵似係竹昇麵，所以非常之爽滑彈牙，正！乳鴿即叫即炸，上到枱面熱辣辣嘅，而且都幾大隻，脆皮乳鴿真係好好味叫咗一杯特飲龍眼冰同埋一杯豆漿，估唔到粥粉麵店都可以有特飲，真心推介！