花園餐廳 (Closed)

中午好耐都無試過去鋸扒啦，於是的起心肝黎呢間本地出名價廉物美既扒房。雖然午餐時段比較多人，但由於我一個人去，點都有單丁位坐既，鋸得扒一定係要係鐵板啦，坐低之後二話不說就叫左個鐵板西冷牛扒餐。等左大約10分鐘就有得食，黎到後我揀左黑椒汁，話就話中午時段，但份量完全無話細左，牛扒一如以往遮住塊鐵板咁大，又厚身，我叫左五成熟，所以用刀唔太難切，牛扒的中心部分係鮮粉紅色，對於我黎講，熟既程度係o岩o岩好，咬落去肉質嫩口彈牙，一D都唔韌，而且牛肉味好濃，最右邊仲有塊細細既肥膏，係西冷扒既精華所在，咬落去D牛油標曬出黎，好香好醇，雖則係有小小油膩，但鋸得扒呢D都係濕濕碎啦，幾耐唔一次，無所謂啦。牛扒下面係好多薯條同兩棵菜，叫做平衡一下呢餐既營養價值咁啦，講左咁耐總之就係好滿足的一餐，咁既價錢有咁既質素，其實真係好好ga啦。