雞米米

Open Now

Now Closed

見經過成日都好多人，所以今日放假同屋企人諗住試吓，去到嘅時間都係見到好多人，之後大概等咗20分鐘左右入得，晏晝嘅時間等有啲辛苦，因為企嘅位置比較曬同冇嘢遮頭🥵不過見佢菜單啲嘢都幾岩食，我哋叫左兩碗米線、半隻豉油雞、兩款醉小食同酸辣鳳爪,醉小食偏甜左少少，但幾入味，酸辣鳳爪幾好食，連配菜都入味，小食味道整體不錯😌反而滿懷期待嘅招牌花膠雞米線，雞肉質偏淋冇乜味，湯底亦唔夠濃郁好飲😅另外一碗叫左砂鍋香辣台山蠔花甲雞米線+一隻醉鮑魚，價錢偏貴少少$110，但諗住好食就冇乜所謂，嚟到嘅時候見到花甲同台山蠔好細隻，而雞同招牌米線嘅雞一樣冇乜味，香辣嘅味道亦令唔到配料入味，湯底香辣，但花甲、蠔同埋雞都入唔到香辣味，最失望係花甲同台山蠔質素一般般，應該唔係太新鮮，所以食唔到海鮮嘅鮮甜味，本身唔+醉鮑魚嘅話米線係90幾蚊，如果呢個價位同質素嘅話真係唔值，性價比唔高至於豉油雞味道整得係唔錯，不過可惜敗筆都係喺雞嘅質素嗰度，偏淋身冇乜雞嘅味道，雖然呢度所有嘅雞賣點都係無骨雞，已經去晒骨，但係食嘅時候難免都仲係有啲骨碎🫢而坐嘅時候比較近洗手間位置嘅枱，一路食一路聞到廁所嘅香薰味令我減低左啲食慾，感覺有啲奇怪🥲