悅滿軒

為咗增添阿仔嘅文化氣息，今日就帶咗佢去饒宗頤文化館參觀，展館夜晚六點就關閉，正值晚飯時間，見到有間餐廳，就決定喺度食埋晚飯先離開。餐廳名字叫「悅滿軒」，起初仲以為係食中菜，原來係一間都幾有情調嘅法國餐廳。餐廳用上藍色配白色嘅椅子，內容充滿歐洲色彩嘅地磚，配合返文化館呢個位置同埋法國餐廳嘅特色。餐牌有頭盤、主菜、扒類、配菜和甜品，選擇多樣化。餐具都特別閃令令，另外餐牌嘅設計令人覺得有中西合璧嘅感覺。落單後餐廳職員首先會送上麵包，職員仲特別介紹呢個係自家製嘅番茄麵包，配上混入咗黑水欖嘅牛油，牛油香而軟滑，麵包外脆內軟，為之後嘅主菜揭開序幕。阿仔最愛食薯條，而呢度嘅係甜薯條，其實係用蕃薯製成的薯條，味道唔錯。老公話未食過威靈頓牛柳，見呢度有得揀，就order一份。威靈頓牛柳大概有手掌般大，賣相吸引。威靈頓牛柳嘅橫切面層次分明，由外到內分別係酥皮、巴馬火腿、蘑菇蓉、同大大件嘅牛柳，牛柳中間粉嫩，仍保持肉汁。另外旁邊仲有串茄，上面灑上少許鹽花，蕃茄稍稍焗過之後，食落就更加juicy。除咗有蕃茄仲有焗原個蒜頭，不過我自己就比較抗拒太濃嘅蒜味，所以唔識形容佢嘅味道，但我知識欣賞嘅朋友就一定會讚不絕口