A.T.A.S

Open Now

Now Closed

今日約咗老公食lunch，去咗銅鑼灣呢間食星加坡菜嘅餐廳，有lunch set。我哋各人嗌咗一個set，再追加兩款小食share。喇沙呢度嘅喇沙好正宗，花生香味濃厚，少少沙嗲嘅感覺，加上椰汁同埋夠辣，新加坡嘅味道出晒嚟。我哋揀咗米粉，口感好好，好掛湯。配料好豐富有白魚蛋，炸魚片，幾隻彈牙蝦仁，同埋勁吸湯嘅豆腐卜，仲有半隻蛋超豐富。海南雞飯呢度嘅海南雞飯係有骨嘅，雞皮爽滑，雞肉有雞味，而且唔嚡，底下還放有青瓜片吸汁，好入味。飲海南雞嘅醬料有齊三款，我自己就最鍾意就係黑醬油加薑蓉。個飯唔會好油，充滿椰汁嘅香氣，食落清爽又好味，齋食個飯唔駛餸都食得津津有味。薑黃炸雞翼我哋套餐加配嘅小食，炸得非常香脆，雞皮下已經沒有多餘嘅脂肪，皮脆肉嫩。咖椰多士另外我哋仲加配咗呢個多士，非常非常邪惡，每件脆脆多士入面都夾住勁大勁厚嘅牛油加上惹味嘅kaya, 想唔好食都難。美祿爆炸飲品方面老公叫咗普通嘅美祿，而我就叫咗呢個升級版嘅美祿爆炸，好大好靚一杯。美祿上邊鋪滿左美祿穀物脆脆，再灑上美祿粉，再有塊夾心餅，超邪惡好味。食完呢個滿足嘅lunch，補充能量，我哋又各自去繼續返工。