○de▽ 鯛白湯らーめん

Open Now

Now Closed

成日嚟到中環都見到呢間鯛白湯拉麵都排晒長龍，今日一於試一試佢。一如以往，今日都係排長龍。睇返佢個menu，佢有三款拉麵可以選擇，有鯛白湯沾麵，鯛白湯拉麵，同鯛清湯，而我今次就揀咗個基本盤，鯛白湯拉麵，試下佢哋個鯛白湯。Lucky,俾咗個靚位我，自己一張枱。佢喺門口嘅時候，已經有個同事幫你用落單機落咗單，所以入到嚟乖乖等食就可以啦。呢個位有個大玻璃窗，可以欣賞到窗外景觀，增加空間感。bar枱位置對住開放式廚房，可以欣賞到拉麵職人煮麵嘅景況。上枱啦，鯛白湯拉麵，盛惠$138。純白湯底再配上黃金碗花，加上粉嫩叉燒同裝飾，視覺上首先已經係一種享受。幫邊黃色嘅係柚子醬，專為淡口人士而設。如果覺得湯底太濃，就可以加入佢中和一吓，確實又真係可行。鯛白湯鮮味濃郁，再帶有些少周打魚味。麵條典型日式拉麵，不過不失啦。叉燒薄切，好香豬味。加咗$15嘅溏心蛋，同其他拉麵店咁上下嘅水準。全清之後，喺碗底係佢哋店舖嘅招牌。總括而言，店面同拉麵嘅外觀都非常美觀，打咭一流。味道方面鯛白湯確實係特別，但除此以外就普普通通，喺而家有如此多拉麵店選擇之下，呢個價錢，令人回頭嘅機會真係不大。