六小館

從東薈城2期開了之後，開咗好多唔同嘅嘢食，就算喺度行完都可以有多啲選擇揀下食邊間，多元化左，搭完360之後，我哋一家人就去搵中菜食，見到呢度裝修好舒服，好新派，座位又闊，亦都有啲四川嘢食，不過今次我哋叫返一啲傳統小小嘅嘅菜式：水晶蝦餃： 熱辣辣咁，入邊好大隻蝦，好新鮮，個皮唔會一夾就散，個皮都彈牙，入邊嘅肉汁都鎖住咗，食落去好鮮味。蝦籽鮮蝦燒賣：好足料嘅燒賣，上面有啲蝦籽，豬肉唔會太肥，調味適中。鮮蝦炒新竹米粉：估唔到炒得好乾身，其實炒米粉係好考技巧，佢做到唔會油冧冧，每條分明，另外鮮蝦大大隻。瑤柱肉碎浸菜苗：簡簡單單嘅一個上湯浸菜，入邊夾雜瑤柱，肉碎，用時令嘅菜，配上上湯，清清地幾好。