金記冰室 (Closed)

入咗大埔探朋友,佢話要拉我去佢屋企附近新開張嘅<金記冰室>試下,聽個名就覺得同普通茶餐廳冇乜分別,呢度除咗新裝修所以格局份外乾淨光猛之外,所有擺設同埋餐具都富有七/八十年代嘅港式情懷,令人懷舊一番。嚟到咁老牌嘅港式茶記,當然要一人叫一份經典大廚嘅鐵板套餐滿足一下啦!!!鐵板西冷牛扒餐($88蚊)：鐵板整份送上往往係茶餐廳最令人感動嘅,尤其是係醬汁另上,喺你面前淋落塊扒度"滋滋炸炸"呢幾秒,確實應該係每一個八十後嘅成年人年少時嘅回憶,爸爸媽媽話帶你去食大餐,永遠就係記住呢一個moment,標哂煙,香噴噴嘅一塊鐵板餐實在吸引。牛扒唔係話乜嘢頂級級數嘅類別,不過就勝在size夠大,啖啖肉好滿足,配埋炒香咗嘅意粉仲有荷蘭豆做配菜,女士理應就冇理由唔飽囉~鐵板美式雜扒餐($80蚊)：雜扒永遠都受人歡迎因為就係裡面超級豐富,有牛扒+雞扒+豬扒仲有腸仔同煙肉,配埋薯菜仲有炸薯條食,本身唔係有番咁上下肚餓都真係唔好叫喇$80蚊呢個價錢喺而家咁嘅環境真係好難得,明正言順「抵食夾大件」!!!價錢雖然話係平,但味道又有水準喎,起碼啲肉扒都分別悉心調味過,煎香過,睇嚟我下次都要帶阿肥幫襯一下啦