千海水產海鮮火鍋放題

Open Now

Now Closed

冬天當然唔少得食放題打邊爐，荃灣呢間新店仲有一排魚缸供應蟹、蝦、鮑魚、蜆、青口等任食海鮮，加埋點心、小食、前菜、飲品、甜品、連同肉類、丸類、蔬菜類、主食等火鍋配料，款色多樣化，真係食到你返肚呀😆一入到就衝咗去海鮮區，超多海鮮，未食已經流晒口水，店員會不斷Refill，揀好後放落鐵兜俾店員幫手清潔。全部大大隻，啖啖肉，連蝦都有幾款可以食，鮮甜入味，爽口彈牙，絕對係回本之選，淨係狂食啲幾樣已經夠晒。QR code落單嘅主要為肉類同某部份小食，因為大部份都放咗喺自助區自己攞。影響深刻而又會再Encore嘅食物包括芝麻雞翼、脆皮鮮奶卷、羊架、燒蠔、極度推介燒榴槤，一定要趁佢啱啱新鮮出爐嘅時候攞，熱呼呼，外層微微焦香，內裏軟滑，正到不得之了，自己都食咗至少一打😛其實一半都未食到已經八成飽，蔬菜比想像中新鮮，鮮甜，吸滿湯汁好惹味，豆苗、花生苗等，出面比較少見，丸類都有唔少選擇，但建議留返個肚食其他嘢啦～ 最後唔好唔記得攞埋甜品，布甸、雪糕、蛋糕、仲有自家製楊枝甘露、珍珠奶茶、甜度適中，值得一試。整體性價比高，收碟速度都快，難怪排晒長龍。