豊洲水産海鮮丼専門店 (Closed)

東京築地市場係令到我愛上食刺身嘅地方，入口即溶嘅大拖羅同香甜鮮美嘅海膽，令人回味無窮，忍唔住次次到東京都要去拜會。豊洲水産作為築地市場內嘅一個批發商，近日打入香港市場，係呢度開設咗海鮮丼專門店。香港女性十個有十一個都中意食日本野，帶喜愛魚生嘅佢地黎食實無錯。呢度環境寬敞，如果坐四人枱的話，仲係有木板同布簾隔開，增加私隱度。Menu數大頁嘅海鮮刺身丼，令人花多眼亂，有預先配搭好嘅，亦有自選丼飯。想一次過試均多款美食，點左一個豊洲二重奏，貪佢有齊海鮮丼同炸雞丼。海鮮丼包括帶子、甜蝦、黑鮪、黑鮪蓉、海膽，仲有松葉蟹，份量唔惹少。海膽、帶子、松葉蟹甘甜。肥美嘅拖羅，未至於入口即溶，但充滿油脂香，食落完全唔會有渣。刺身新鮮不在話下，拌碟亦特別用上青瓜粒等，拌飯後帶爽脆口感。另一個唐揚炸雞丼，炸雞香脆可口。值得一提嘅係三文魚蛋卷，粒粒三文魚籽卜卜脆，蛋卷香口，個人都幾喜愛呢個組合。套餐附送嘅麵豉湯，同碗飯一樣大碗，用料豐富，鹹度適中帶點魚香。再叫左啲小食，有明太子蛋卷，甜甜嘅煎蛋卷，帶少少明太子嘅鹹味，又有口感。燒日本和牛串，和牛肉未夠滑嫩，不過味道就不錯嘅而且肉味都幾濃郁。