火山燒 (Closed)

之前幾次去到荃灣都想幫襯火山燒，不過次次見到門口等位嘅人潮就秒速放棄。早排趕及十二點零去到，未到 lunchtime，終於有位。當然要試名物金標和牛肩胛肉 68 度溫泉蛋珍珠米丼，估唔到好大碟，珍珠米好飽滿，份量好多，上面淋滿燒汁，仲有鰹魚碎，紫菜同飯素，撈埋溫泉蛋汁一齊食，唔使食餸都已經好夠味。牛肩胛骨份量都算多，有牛味，不過略嫌有部份煮得 over 咗，有少少嚡。另外又叫咗個烤焗千層麵，呢個嘅醬汁味道非常濃，茄汁味偏酸，芝士味亦強，啱哂重口味人士。千層麵睇落幾細個，但係食落份量都幾多，唯一麵質比較粗糙，唔夠幼滑，影響口感。加錢換杯彩虹棉花糖特濃朱古力，呢杯反而比較失望，好甜，但係朱古力味就幾淡😐。