千里屋食堂 (Closed)

去銅鑼灣搵朋友食飯，放工時間唔知食乜，行過見到個餐牌好吸引，價錢都唔貴，就決定試下。一入到去就見到有日本客人食緊，相信呢間餐廳應該幾地道。千里屋食堂係一間食和牛既餐廳，佢呢度亦都有高級既飛驒牛食。咁我地決定乜都試下，鐵板，丼同壽喜燒都各叫左一款。熟成黑牛Champion Steak Don岩晒d中意食牛既大胃王，上面鋪有滿滿既澳洲和牛，冇乜其他配菜，基本上係一半牛一半飯。牛肉大約七成熟，咬落軟腍腍，一d都唔韌。配上蒜蓉味醬汁，食到停唔到口。飯就用上日本珍珠米，好香。和牛鐵板三種，故名思義就係有三種和牛用鐵板燒，上枱既時候牛已經係燒得岩岩好，鐵板純粹係保持著個溫度。三種係唔同部位既牛肉，我自己最中意脂肪最多既個個部位，牛肉入口即溶，亦非常香，食完個咀令立立，充滿牛既油脂，呢個價錢食到三種咁正既和牛真係性價比超高。而朋友既高級鐵板燒就真係要自己燒既，牛肉亦都好好食。壽喜燒醬汁好甜，牛肉煮完味道入晒落去，送飯一流。