鰹烏冬 (寶華閣)

Open Now

Now Closed

聽聞啲烏冬好好食，試完有少失望揀湯底揀左好耐，因為唔係好吸引，本身都對湯底唔抱太大期望，因為佢始終出名係烏冬好食，最後都係叫左清湯諗住係招牌。上到枱果然真係好唔好抱有期望，係好淡既湯底差唔多同水加少少鹽咁，我要係咁加七味粉，但係烏冬係真係幾好食，偏粗又彈牙，只係奇怪做烏冬做得好又係招牌，點解唔改善下啲湯底，又可能係我係重口味人士叫錯湯底，人地淨係靠烏冬都咁紅一定有佢特別之處。唯一要讚既係骨付雞，好香蒜味同夠juicy又嫩。另外仲叫左個炸流心蛋，流心部分OK，炸粉都可以，如果可以有多少少咸味就更加對得住$20一隻既流心蛋。鯖魚正常質素，唔難食。最後係成間餐廳走日本風，的確個環境有少少令我覺得似係日本，但店員係比茶餐廳服務 ，最後賣單，個店員講完幾錢收完錢找錢就一句野都無講，多謝都無，只係掛住同個同事吹水係咁重覆「得唔得架」，我個下覺得自己原來係茶記食野。