走過十萬八千里找到你

Open Now

Now Closed

油麻地依間「走過十萬八千里遇到你」嘅裝修設計充滿花花草草，好啱打卡，午市選擇幾多，略嫌D主食份量差異都幾大，鰻魚飯高CP值，而且味道唔錯，另一款主食同飲品價錢都比較進取。*此餐廳收取加一服務費。日式原條鰻魚意大利飯（單點$178），鰻魚表面鋪滿蒲燒醬汁、木魚花、紫菜，肉質厚嫩，口感彈牙，味道鮮甜，意大利飯口感有咬口，食落帶有蒲燒醬汁嘅味道，配料包括有香菇、洋蔥、翠玉瓜。北海道帆立貝海膽醬扁意粉（單點$178），份量少，表面鋪有木魚花、紫菜，香煎帆立貝食落有鮮味，扁意粉口感軟硬適中，容易掛汁，海膽醬味道鹹鮮，但略嫌海膽味道微弱。2碗餐湯（跟餐$0），番茄湯，表面鋪有香草，味道酸甜，內有茄蓉。多士（跟餐$0），蒜蓉包，表面鋪有蒜蓉香草牛油，略嫌份量比較少，所以食落未夠香口，法包未有經過烘焗，口感偏韌。紅寶石巧克力草莓鮮奶（單點$68），表面鋪有玫瑰花、忌廉，採用明治牛奶製作，奶味醇厚，內有新鮮草莓果肉，味道香甜，但略嫌紅寶石巧克力味道欠奉。熱鮮奶焙茶（單點$56），焙茶茶味濃厚。