滾爺火鍋 (上海街)

Open Now

Now Closed

今日約咗朋友去旺角上海街打邊爐。我哋叫咗個套餐，叫做滾得飽二人餐$396。入邊有一個鴛鴦鍋，皮蛋芫荽湯底同埋沙嗲湯底。沙嗲湯底嗰邊有好多豆卜同埋大豆芽菜，味道比較濃郁啲，芫荽皮蛋湯底，就比較重芫荽味，皮蛋都算足料，味道就會比相對下清啲。套餐入邊有海蝦四隻、花甲六隻、西班牙無激素豬肉、手包韭菜餃四粒、鮮甜手打鯪魚滑、山根同埋讚岐烏冬。由於套餐冇嘢飲，我哋額外添加咗兩個椰青，再叫多個紅薯粉。海蝦同埋花甲都好新鮮，都好容易滾得熟。西班牙無激素豬頸肉，都算快熟嘅，熟咗之後會好白同埋容易吸收湯底味道。烏冬本身有兩塊，容易吸收湯汁放落沙嗲嗰一個鍋，覺得會咸咗啲，如果放喺芫荽皮蛋湯底，反而會幾好味。手包韭菜餃四隻，韭菜豬肉新鮮，放入火鍋其實都幾快熟，味道幾好。鮮甜手打鯪魚滑，新鮮同埋口感彈滑。最後，我哋都會覺得唔夠，所以叫多咗個紅薯粉，放入芫荽湯底幾好食。