美味故事 (Closed)

喺網上見到旺角始創中心一帶嘅呢間西餐廳，去到附近都算難搵，位置喺要行樓梯嘅舊樓，如果唔係網上一早book好枱搵定資料應該都未必見到。一坐低，店員都好好咁送每位食一杯西瓜沙冰，清清甜甜，喺咁炎熱嘅天氣下真係好解暑。今次叫左個套餐包2個set：首先上左餐湯，有蘑菇同南瓜湯，夠熱同濃度適中，配埋前菜沙律同小食一齊食，當中柚蜜寒天海藻沙律好開胃，酸酸甜甜嘅醬汁配上沙律菜，岩岩好中和返濃湯嘅膩。主菜叫左美國安格斯西冷，生熟度跟左佢哋廚師嘅預設，份量幾多，肉質唔會太根幾易入口，配上醬汁幾惹味。另外點左牛油果醬鵝肝漢堡，賣相相當靚，牛油果醬加上鵝肝同芝士嘅漢堡食法，真係幾邪惡。而每一客主菜都會配煙肉酸忌廉焗薯，唔怕唔夠飽。野飲點左柚子蜜茶，味道正常，不過唔算好有驚喜。當日嘅甜品有兩款，分別有藍莓芝士蛋糕同金寶檸檬蛋糕，後者都幾特別，因平時嘅晚餐甜品都相對前者少見，而食落都唔錯，甜度適中而酸酸地又可以解膩。