如月居酒屋 (Closed)

近日天氣反反覆覆，行行下街遇正落雨就最掃興！今晚係旺角附近又有雨，行經通菜街有間居酒屋門面幾新淨應該剛裝修完，見唔係太多食客唔駛點排隊等位，姑且入去醫下肚。雖然店名是居酒屋，不過環境格局都幾寬敞舒適好光猛，牆身畫了個大型日式招財貓及貼滿日式懷舊海報，算幾有日本feel。食物選擇有好多佐酒小食，又有炸物有串燒有飯有烏冬等，見唔係太餓就隨便點些食物試，個牛油炒支豆都炒得幾香，每粒都好有牛油味；芥辣八爪魚唔算太辣，青瓜粒有好多，夠晒開胃；吉列日本多春魚炸得幾香脆，如果多春魚再肥美飽滿點就更好；串燒方面由於趕時間唔知要等幾耐，只點了最快燒好的翠玉瓜甜薯仔同豬頸肉串過下口癮，大廚掌握火候幾好，燒得不會過燶，調味適中。至於海膽明太子冷烏冬好適合夏天食，烏冬煙韌，明太子醬超多，一個人食都夠飽。