星廚 (Closed)

今日同老公去太子買奶粉，行到攰周圍搵野食，本身老公話想食壽司，但凍冰冰我想食熱野，所以食茶餐廳好了，我比呢間餐廳既餐牌吸引住，太子竟然有咁平既午餐？一個午餐4X包餐湯熱飲仲要有雪糕？餐湯係南瓜湯，顏色好靚，金黃色，個湯好鮮甜，飲落仲有南瓜蓉咬下，幾有咬口架！（美中不足，無餐包XD），老公揀左紅酒燴牛尾燴飯，牛尾件件都好大件，肥大肉厚，骨同肉既分布平均，飯份量都唔小，一個人夠食有餘，重點係只需$45！重點推介！呢個紅酒味真係有紅酒味架！好多餐廳都係得個講字，根本就無紅酒味，呢個紅酒味唔算好濃，但係好明顯飲得出，呢個幾特別。我自己叫左鴨胸香草醬意大利粉，呢個平d，$42，一黎已經好香，鴨胸大約有7，8片，意粉比較硬身同較粗，係炒過既意粉。青醬佈滿所有意粉，青醬味道好濃，有九層塔既味，如果落左青醬，睇怕都唔使其他調味料啦，夠晒味！是日雪糕係紅豆味雪糕，正！開正我個範，剛好一球正糕，雪糕有粒粒紅豆，好滑，味道似係紅豆溝左奶咁，老公忍唔住加錢叫左個焦糖燉蛋，燉蛋係凍食，焦糖味好重，為平平無奇既蛋加添顏色∼