鳳城酒家 (Closed)

星期日阿爸又話要去飲茶，又係指定去鳳城。其實我就麻麻地鍾意鳳城，雖然佢點心係做得唔錯，不過款式實在少得可憐。一張點心紙只有大概20樣點心，仲要係傳統點心。所以唔會成日黎，otherwise食得一、兩次就會厭。二樓11點開，於是阿媽就11點去攞位。不過正值金融海嘯，生意奇差，唔洗等之餘仲有大把位剩。真係靜得好犀利。炸魷魚鬚保持一貫水準，新鮮炸起，好熱帶點脆口。魷魚粗身，唔韌。煎腸粉煎得唔肥膩，又唔會乾得滯。腸粉滑身，有少許蔥粒。細細碟，少食多滋味。蒸排骨份量少，但用上新鮮排骨，肉味十足。仲有一舊吸晒味嘅芋頭。牛肉球好味，三大粒。彈牙，有香蔥同少許陳皮味。薑蔥牛柏葉份量多，薑蔥味濃，且入味。牛柏葉爽口唔韌。腐皮卷又係新鮮即炸，燙口。香脆可口。每節都有一隻蝦、豬肉同韮黃。菜遠牛肉河見到人地食好似好正，於是又整番碟食吓。較肥膩，獻汁頗杰。牛肉嗱過，已無什味道。河粉幾好，粗身滑口，但不太入味。點心質素係唔錯，只怪款式太少。