瀛燒居酒屋

Open Now

Now Closed

之前同老公黎過呢條街食嘢，走嘅時候就發現有間居酒屋，老公話下次要食呢間，所以今日去開荃灣就順便過黎食飯。入到去就已經覺得好熱鬧，好多人，同埋充滿日本居酒屋feel。無論裝修、牆上海報同播嘅歌，全部都充斥住昭和年代。餐牌幾多嘢食，老公發辦叫左小食、串炸、燒物、鍋物同兩杯酒。煙燻豬乾：口感好蓉，味道鹹鹹地，少少咁食，送酒一流。鱈魚白子(半份)：口感細滑軟軟，味道濃，都係送酒之選。雞皮餃子：炸過外皮酥脆，裡面脹卜卜，軟嫩多汁，雞皮油香十足，味道剛好。海膽甲羅燒：海膽、蟹肉同蟹膏味道好濃，配埋蟹籽咬落去好爆，加埋旁邊飯團一齊食，真係好好食。燒雞心喉管：雞罕有部份，燒得剛剛好，有咬感，好香，OK喎。串炸：有沙錐魚兩串，鵪鶉蛋、蓮藕及三文魚親子各一串，呢度全部都係剛炸起，熱辣辣，外層薄薄炸粉鬆脆，點埋旁邊甜甜地燒汁幾好味。辛味噌牛筋肉鍋：牛筋份量多，炆到好淋，入味，裡面有娃娃菜、大蔥、韭菜、冬菇同日本粉絲等吸汁配料，越煮越濃味，辣味亦出左黎，整體唔錯。飲品：叫左可樂highball同高知柚子，兩杯酒味重，其中高知柚子甜甜地，似果汁，易入口，我就幾鐘意。