拉麵來 (Moved) New Location

是日氣溫只有八度 凍到震 一定要食啲熱辣辣既野 約左一位係旺角上班既朋友午餐，我地今次就揀左去位於黑布街既拉麵來食番碗拉麵 我地大慨1:30到達，店內既裝修同佈置都充滿日本風情。當時店中只有三枱客人，所以我地唔需要等位就可以入座喇。枱既旁邊有啲籃 可以比客人放置手袋等物品，枱面有蒜頭、白芝麻、漬物等配料供客人添加。呢到既拉麵係分《金 木 水 火 土》既，我本身都幾喜歡松露，所以我一見到白松露三個字就決定左揀《木》既白松露豚骨湯拉麵 （$118），而同行既朋友就揀左白松露豚骨石鍋沾麵 （$128）。好快我地嗌既拉麵就到左喇，一放上枱就聞到好香松露味！！當然要即時試下個湯底先啦，湯頭濃淡度我揀左濃啲，結果都真係好夠濃，都幾膠質，唔錯！見到佢放係上面既松露醬份量都好足夠 有兩片叉燒、木耳、紫椰菜、雜菌、蔥粒同紫菜。而麵質我揀左普通，我覺得幾好食，軟硬度剛好。而我都試左朋友既沾面，朋友覺得沾面既湯味道剛好，佢表示好滿意，而我就覺得沾麵既湯底比起我個碗淡小小。我都係比較喜歡重口味既拉麵湯底。