翡翠拉麵小籠包 (Closed)

今日lunch time黎到ifc食lunch，揀左喺2樓呢間翡翠拉麵，ifc呢間分店都係第一次試。12點準時黎到，仲未需要等位，但過左10分鐘，門口就開始多人排喇。我地2個人，叫左雞絲粉皮、紅油抄手、小籠包、同擔擔麵。雞絲粉皮好重麻醬味，食完有啲溜，令我冇咩胃口食其他嘢。而友人亦覺得粉皮太厚身，如果切薄啲會好啲。紅油抄手就不過不失，雲吞皮薄同好滑，涵料亦ok，配搭紅油幾好。不過，我略嫌佢冇炒蒜同唔夠蔥花，令到味道冇咁豐富。而且佢比較酸，可能煮嘅時候落左好多醋。之後就到食小籠包喇。小籠包唔好味，熱就夠熱，但小籠包入面竟然係冇湯汁架，加上皮本身都幾厚，搞到個皮好dry，我一啲都唔推薦食客去食。一間上海餐廳，連最出名嘅上海菜小籠包都煮唔好，令我有啲失望。令我滿意嘅一碟餸係擔擔麵。佢嘅湯底夠濃厚，有好重麻醬味道，麵亦爽身，軟硬適中。佢同紅油抄手一樣，湯底有啲酸酸嘅味道，但係整體黎講幾好味。