Canadian Pizza (H.A.N.D.S) (Closed)

聖誕日，下午4點幾，屯市，人山人海，插針唔入，幾家人都唔想出去迫餐廳喪等位，寧願去安定邨附近加拿大人訂外賣自取算喇。當中有人聲稱異常地肚餓，能鯨吞，於是買2個大批，分別係芝士四重奏，同比較另類味嘅D24榴槤菠蘿，外加爆谷雞粒，炸雞翼八件。芝士四重奏混合4種芝士，四味紛陳，再加茄醬，蜜糖為佐，如非芝士控，舌頭大概只能分得出車打，水牛芝士。比較適合會再嗌其他肉類小食選擇，唔駛全部肉肉肉。個人比較鍾意榴槤菠蘿個批，每件都有榴槤蓉的濃香，既然用到D24級數，口感就更滑順綿密，香甜中帶有奶油味，太霸氣，菠蘿無奈地淪為陪襯。爆谷雞件非預期中有爆谷味或有爆谷黐住件雞，諗多咗，反而似韓式炸雞。雞翼外層沾咗麵包糠炸，攤凍咗半個鐘都仲有脆感，兩款雞本身冇乜鹹味，必定靠盒入面防油紙冚住嘅蛋黃醬或炸雞醬調味。見好多人喺旁邊買奶蓋買得好過癮，下次一定要試試！