八沢 (筲箕灣東大街)

Open Now

Now Closed

不嬲都最鍾意食烏冬，朋友介紹東大街呢度，有間又抵食而且又好味嘅日式烏冬店，咁今日就試吓啦。呢度嘅裝修好有日本風味，估唔到呢度既落單方法係用新科技，係放qr code自己睇圖落單嘅，夠晒方便。見到隔離枱有啲年紀比較大嘅客人，佢哋可能冇smartphone，侍應就好細心咁比咗餐牌佢哋就咁落單。我就叫咗個肥牛湯烏冬，而朋友就叫咗一個牛扒掛烏冬。我嘅湯烏冬湯底十分好味，同烏冬好夾。烏冬係日式嗰種，比較彈牙。另外都有好多肥牛，而且唔會煮得太耐，牛味足夠。試左幾啖朋友個烏冬，估唔到個牛扒超級高質，食落好似啲專食牛扒既餐廳咁，牛肉嘅質地同埋味道都啱啱好，搞到我忍唔住偷食多幾舊。另外我哋仲叫左串燒，呢個串燒雞拼盤好豐富。我最推介嘅就係佢嘅雞軟骨，燒嘅時間啱啱好，而且唔會太硬，口感一流。飲品方面我叫左杯棉花糖朱古力，佢嘅味道啱啱好，唔會太甜，但係朱古力味又好夠，啱晒女仔。呢間餐廳味道又好，而且價錢都比較實惠，唔怪得咁多街坊同客人幫襯啦。