潮州仔食堂 (Closed)

每次來荃灣都要去呢度食返碗豬雜麵、炆豬手和豬膶腸，又平又好食。呢度好多特別部位都有，必食豬黃喉、豬肺、豬粉腸、豬大腸，個白胡椒豬骨湯底好濃郁，夠辣又夠熱，每次都會飲晒啲湯。我通常會叫多一份淨豬手同老公 share 食，大大件，豬皮好彈牙，肉炆得好腍，要用手食慢慢嗒。再加一碟豬膶腸，潮式腸粉唔係一碌碌而係一摺摺的，超滑溜，個豉油甜甜地，真係超好食。間舖雖然細細哋，有卡位有梳化位，都坐得舒服，真係百吃不厭。