凱日粵菜館

Open Now

Now Closed

間店開咗幾個月，第一次去食晚飯。之前有幫襯過飲早茶同埋午飯，都係正常大路嘢，估唔到今次食晚飯有驚喜。用料對得住價錢，炒小菜功夫好，碟頭大⋯ 今時今日，有齊三樣，好難得。最欣賞個鮑魚啫啫雞煲，佢個汁落咗蜜糖，好考功夫，因為好容易煮燶，稍為過火，成碟嘢就會變得有苦味。佢一啲燶味都冇，結果每件鷄有啫雞煲嘅多汁，又有炭燒雞翼嘅甜味，肉有鷄味，正。啲鮑魚一件開六粒，粒粒肉都鮮味，估計都有10粒，例牌來講算係足料。另一碟係薑汁玉芥蘭，即係將啲芥蘭葉拎走，淨食個支框。新鮮薑切成方粒，好似花生仁咁大。啲菜自己新鮮多汁，連埋外邊嘅薑汁，味道幾好。但係啲薑汁則埋一邊，淨係底嗰啲有薑味，下次碟菜上枱自己再撈多幾下先。第三碟係蓮藕青豆炒豬頸肉，加咗少少什菇，增加口感；材料新鮮，唔係好重豬油，冇乜味精，就係咁簡單。