尚夢・茳煳 (Closed)

下午同同事係灣仔見客後, 順便係附近食埋Dinner先返去。記得上年疫症高峰期禁咗晚市堂食期間, 去過灣仔呢間尚夢外賣過”牛頰肉”食, 好食得令我記起呢間餐廳, 趁住宜家有晚市堂食, 可嘗試一下其他家常小菜!餐廳面積不大, 沿著吧檯經過, 入面有三張卡位。卡位坐得舒服。熱茶有小火興住, 叫咗兩個家常小菜食。花膠海參蝦米濃湯雜菜煲: 熱辣辣上檯, 湯底清清地, 墊底有大量索盡湯汁好林嘅西蘭花、菜心莖、生菜片、小棠菜, 全部菜樣樣都有d, 而且都係好林, 老人家冇牙都食到。海味佈哂係面, 有兩件手指般size開邊海參仔、蝦米, 同埋有如豬皮口感彈牙嘅花膠。石榴果干糖醋咕嚕肉:每件咕嚕肉都冇骨, 啖啖肉, 肉質有彈性, 每件表面平均沾上甜甜嘅汁醬。叫咗個飯, 飯質好挺身而且偏乾, 自行加咗雜菜煲湯汁撈埋食, 較好一點。