MUM 日常野菜料理 (Closed)

日式野菜料理喺香港選擇並唔多，我喺逸東酒店個 food court 就食過一次，第一次，亦都係唯一嘅一次，估唔到賣相精美之外，味道仲非常不俗，一試難忘。呢度嘅日常定食有三餸同四餸兩個選擇，我揀咗三餸，另外仲配有五穀雜炊飯，味噌湯同麥茶。餸菜共十六款，十一熱五冷，剩係睇名都好吸引，一時間好難選擇😅，左揀右揀，最後揀咗金平牛蒡，薑蔥汁煮茄子同埋蘿蔔冬菇關東煮。我覺得呢類日式野菜料理最吸引之處，在於雖然食材簡單，但係烹調方法非常用心，擺盤一絲不苟，所以只要食材夠新鮮，就已經好好食。三個餸之中我最鍾意係薑蔥汁煮茄子，一來我本身好鍾意食茄子，加上個薑蔥汁好能夠帶出茄子嘅鮮味，非常好食；另外，關東煮雖然調味簡單，但係紅蘿蔔同白蘿蔔又甜又腍，感覺好清新；金平牛蒡則充滿麻油香氣，又係好正👍。