孖沙茶餐廳 (Closed)

再一次嚟到孖沙，目的當然係要試一試呢度嘅至尊頹飯(3眼仔飯)，睇吓究竟有咩特別，我當日去到孖沙嗰陣時，仲差大約10分鐘先至到上午11:00點，但店內已經坐滿客人，嘩……唔係吖嘛？所有真係有理由相信3眼仔飯到中午12:00前可能就會賣哂，幸好我趕得切埋位，然後即刻叫阿姐幫我落單要個腸仔煎蛋飯，阿姐同我講，話3眼仔飯最少要等20分鐘，我話冇問題，等咗廿分鐘之後，碟飯終於嚟度枱面，3隻蛋真係煎得好靚，而且帶有燶邊，腸仔炸過非常香口，再加埋秘製甜豉油及煙韌嘅飯粒，將蛋黃篤穿，蛋汁+甜豉油+飯粒嚟一次大兜亂，即刻產生咗化學作用，真係好味！喺我食緊飯嘅同時，我聽到老闆向客人係第3次同客人講煎蛋飯暫停(短短15分鐘內第3次叫暫停)，認真誇張，而且呢度嘅用餐環境真係非常擠迫，一張好細嘅圓枱，但同時要坐7個人一齊用膳，所以要嚟孖沙開飯嘅朋友就要有心理準備，食飯嘅動作真係唔好過大，否則會好容易撞親隔離