石一燒 (九龍城) (Closed)

有得玩有得食慢慢燒：慢活岩石燒肉以慢活為宗旨，老闆帶住溫泉旅館嘅飲食經驗係九龍城開咗第二間石燒店。佢對肉食非常講究，嚴選日本九州嘅貨源，另外有英國皇室御用嘅肉商。單睇前菜已經別樹一格：辛辣帶子裙邊，櫻花蝦味噌湯，紫薯天婦羅，泡菜，麻醬沙律。碟帶子裙邊調味好有心思，係日式醬漬加少少川味。主角燒肉拼盤真係好靚，有肉有菇有菜有石有葉有蝴蝶。由宮崎豚食起，之後到美國頂級牛小排，壓軸係英皇御用羊西冷。三款都好高質，唔需要落調味，本身石燒同油脂嘅原味道已經一絕。小朋友先做選擇，對肉食有要求嘅人，黎到真係要試齊豬牛羊。羊西冷做左28日熟成，第一次咁享受裸食一件冇額外調味嘅羊肉，有被驚艷！食到咁上下記得玩啤酒挑戰，男生7秒/女生9秒飲晒一杯就免費，拍片分享會送多杯！仲要有幾隻沖繩啤揀，是日勇者試左Orion 黑啤，勁嗨！配肉可以揀飯或者烏冬。最後甜品同熱飲都有驚喜！燒完肉黎一杯熱普洱咖啡，舒服；飯後茶係佢地自家調配，每晚隨機。甜品可以自己手沏抹茶醬，淋落雲呢拿雪糕，加少少莓乾脆脆，完美了。老闆勁好傾，佢仲推介左一款有唐辛子味嘅梅酒俾我地，刺激特別又回魂，希望遲啲開賣！