鴨仔冰室 (Closed)

今日去咗公司附近嘅呢一間鴨仔冰室度試下新嘢，餐廳以鴨仔為主題，周圍都放咗好多鴨仔嘅擺設，仲有埋壁畫，而門口亦都掛咗一隻大大隻嘅鴨仔，非常易認。凍檸茶少甜，獨立包裝飲筒份外衛生，紅茶檸檬，比例完美。是日餐湯係椰菜花忌廉湯，上枱嘅時候仲係熱辣辣，喺今日得8度嘅氣溫之下飲碗熱湯真係好鬼正，椰菜花同忌廉味道平衡，喺裏頭仲能夠搵到一粒粒嘅椰菜花，認真真材實料。鴨仔什扒配薯條(豬扒、牛扒、雞扒)，什扒陣容鼎盛，上枱嘅時候肉香撲鼻，牛扒完全無經過鬆肉粉嘅洗禮，所以仲保留到比起坊間冰室牛扒更香濃嘅牛味；雞扒煎得好香，口感嫩滑；豬扒仲見到一格格嘅燒烤網紋，令人食指大勳。配菜有薯條、棷菜同紅蘿蔔，喺冰室食飯有條菜食已經相當開心，鴨仔呢度仲要係海量嘅蔬菜，完全滿足哂我個"菜胃"；薯條熱辣辣又異常咁香脆，好明顯係新鮮炸起，整體相當高質。臨走時為12點九，門口已經有一噸人企咗喺度，想食好西嘅朋友記得早啲到喇。