居食屋「和民」 (Closed)

基本上每年都會有一啲時間係會幫襯和民，因為之前登記左做和民卡嘅會員，每當到你生日嘅時候，和民就會送你兩張現金券，要當月使用。變相嚟講，如果自己同屋企人都有用和民卡，一年就會幫襯佢幾次喇。上次食都已經大半年前喇，感覺上菜單都同之前冇乜分別。鐵板餃子。一客有六隻，上菜時會附有餃子醋。食落略為油膩，感覺真係好一般。芥末脆炸雞翼。上菜嘅時候熱辣辣，口感鬆脆，再加上有蜜糖芥末醬，令到件雞翼更加好食，甜甜辣辣噉樣。滑蛋豬扒盒仔飯。上菜嘅時候，滑蛋已經全部變成熟蛋，用熟蛋嚟撈飯真係冇滑蛋咁好食嘅，真係要扣點分。吉列豬扒外皮已經腍曬，個人就覺得麻麻地。鐵板雞腿。呢塊雞扒分量好大，亦都整得唔錯。雞肉鮮嫩，有肉汁，真係種去舊式扒房食鐵板嘅感覺。總嘅嚟講，和民都算係一間不過不失嘅日式餐廳，始終和民品牌都屹立多年，而且價錢親民，再配上生日優惠，仍然有一定吸引力。