炎天丼 (Closed)

店主貼出告示指每日限量供餐，賣完即止，飯係用日本米煮製。套餐之一海老天丼，中央位置放咗一隻半熟蛋，蛋的四周用一片蓮藕、一大片南瓜、一件茄子同兩片葉層層疊咁冚住，堆砌出一個高台，拱照中央一隻炸蝦，碗邊放一片紫菜，擺法有啲似金子半之助。炸漿本身帶咸味，加埋灑喺餸面的味粉同飯入面的醬油，成碗飯好夠味。咁多樣炸物，搶先食炸蝦，入口咸咗啲啲。粉漿炸出嚟夠薄身兼脆口，蔬菜片切得較一般日式食店的厚身同大件，絕對討好。跟餐沙律同麵豉湯都係淺嚐咋，前者菜較硬，後者略重鹽。唔飲湯冇問題，店方有開水供應，小姑心想若果有茶飲就好喇，可能慣咗光顧日式食肆係會飲茶。吧枱高腳櫈的櫈底設有一藍子，供客人放置隨身物品，夠細心。不妨做多步，好似日本人咁加多塊布冚住個藍，客人一定會用得更安心。