The Musicbox Grill House & Bar

Open Now

Now Closed

前上司退休，祝佢生活愉快之餘，當然要約佢食返餐，揀咗一間既新穎又懷舊嘅西餐廳The Musicbox Grill House & Bar，呢度有人現場表演捽碟，所選嘅歌曲都係懷舊長青英文歌，夠晒氣氛。我哋志在見面，對於食物都唔會太講究，就叫咗個二人晚餐，由餐廳幫我哋安排。首先係每位一客新英倫粟米周打湯，另外配上蒜蓉包。周打湯唔會過鹹，入面材料豐富，粟米粒尤其多。頭盤嘅香蒜牛油煮蜆份量絕不欺場，食極都仲有，佢嘅蜆肉粒粒飽滿，而且佢嘅蒜蓉牛油汁同海鮮真係好夾，大家都食唔停口。旁邊嘅蒜蓉包都好香脆。草飼澳洲肉眼牛扒雖然話係10安士，但比起平時見過嘅份量多好多，又大塊又厚身。旁邊仲有新薯、蕃茄同大菇作配菜。肉眼扒肉質腍得嚟又有肉味，有口感得嚟又唔會有筋，確係一塊好高質，亦都處理得好好嘅牛扒。另外仲有帶子松露意大利粉，可以選擇長通粉、意粉或者扁意粉，我哋就揀咗最有口感嘅扁意粉。帶子有四大粒，外面煎香而入面仍然保持嫩滑嘅肉質，配合埋濃濃嘅黑松露醬，實在冇得頂。甜品係芝士餅，又香又滑又唔太甜，而且每人一小件，份量剛剛好。餐飲我哋就簡簡單單，揀咗可樂同檸檬茶，走咗甜嘅檸茶就更有茶香。