常滿百家菜 (Closed)

今晚本來想同太太去楊屋道買料打鞭佬，奈何整天落雨，加上太太做完「飛素」回來已經五點幾，但係打鞭佬條癮仍在，於是近近地試吓呢間常滿，真係遮都唔駛擔。是晚收費$139，再加$10任飲，但係我地八點前交檯又平返廿蚊，即係同平日價錢一樣。地方唔大，而且幾大排檔FEEL，但係都算乾淨。有兩個大筒，一個放啤酒(森堡加獅威)，一個放汽水(好多款，主要係忌廉同冰紅茶)，另外有架果汁先生機，睇住係原樽倒落去，冇溝水。呢度嘅免費鍋底都幾多架，除左常見嘅清湯、沙爹之外，仲有水煮鍋，而且仲可以雙拼，咁就試吓清湯拼水煮。湯底幾厚，水煮嗰邊撈到好多辣椒同花椒，真係又麻又辣，清湯就普通料。火鍋料選擇比較少，但質素唔錯，肥牛唔係七肥三瘦嗰隻，菜類都算新鮮，係D蝦好細隻。漏單情況唔嚴重。另外每位一件響鈴(OK，不過唔係好GOOD)。驚喜嘅竟然係呢度熟食嘅水準，自取嘅炒菜同炸雞翼，兩樣都暖嘅，雞翼仲好脆口添。至於點心，我地只係試左蝦餃、燒賣、春卷同炸雲吞，蝦餃好多蝦，好爽口，燒賣大大粒，炸雲吞同春卷都好脆，全部都係即叫即做，所以要等耐D。八點前飽晒交檯，慳返廿蚊！