王子冰室 (Closed)

屋企有電器壞咗要拎嚟新蒲崗嘅工廠區修理，之前已經上網睇咗有咩好食，不過身為路痴嘅我地圖都未睇得掂，原來多食肆嗰邊距離工廠區成七八條街，無奈之下喺附近睇吓有咩食，最後揀咗呢間小冰室。一入到去咁啱有人埋單，我哋兩個人有卡位坐。冰室裝飾以懷舊嘅畫為主，雖然細細間，但客人好多，而且人手好足👍，職員做嘢好快手，食物質素唔錯，兩個人食咗一個午餐兩個下午茶餐，價錢幾抵。午餐嘅招牌無骨海南雞飯，雞好嫩滑，雞肉透出少少粉嫩，唔會太熟，飯有淡淡嘅油香，粒粒分明，湯就鹹咗啲。下午茶嘅懷舊芙蓉煎蛋飯，煎得香噴噴嘅蛋全蓋過飯，裏面有蝦仁，火腿，叉燒，飯雖然只有豉油，但入口唔會乾。下午茶嘅夾心西多士，花生醬多啲會更好。