攣毛屋 Curly.Resutoran

Open Now

Now Closed

前幾日星期四晚約咗朋友食飯，想搵個地方好好傾吓計，結果search到呢度近朋友返工地點就打去book 位試吓。因為店主剛剛喺嗰個星期先開晚餐，我哋都有幸成為首輛晚市客人。當晚唔多人，店主好好咁俾我哋兩個人坐張四人檯鬆動d。其實見佢近窗嘅位都好chill咁，如果自己一個人應該會揀個度坐、望吓街景。我點咗個 軟殼蟹蟹黃蟹肉忌廉汁意粉，個汁好creamy、軟殼蟹份量都好足、仲額外跟咗個醬。朋友點咗個 唐揚炸雞配日式炒意大利麵。d 炸雞個樣好靚仔，我唔食雞無試，但試咗個炒意粉都好香好夠味，店主仲提供埋生蒜可以撈埋提升個味道，真係好好味。我哋加咗套餐配餐湯（當日係南瓜湯）,蒜蓉包（同出面唔同嘅蒜蓉包，係幾正）及餐飲。同店主兼大廚傾談中得知對方係一個對食物質素好有要求嘅人。包括食物嘅溫度、調味、賣相。我係好怕d食物上檯溫度唔夠熱嘅人，喺呢度就真係好放心啦😆 不過因為大廚得一對手，所以都要預時間俾佢精心炮製，絕對唔建議心急人去。甚至我同朋友互相交換少少意粉試味，店主都主動拎隻碟仔俾我哋，話咁樣唔使怕兩種唔同嘅味溝埋一齊，呢d細節位都睇到店主有嘅細心。呢一區、呢個價錢真係性價比唔差，食完會覺得開心嘅。