赤山風味料理 (Closed)

今晚去左新蒲崗廣場行下，唔知食咩好，見到有間日本野又幾多人食，價錢又唔係貴就入左去。環境唔算大，不過勝在坐得舒服。我地叫咗大概10分鐘就有得食。首先，我哋叫咗赤山風味沙律。價錢＄38，但份量都算幾多，點左芝麻醬幾好食，竟然有牛油果，感覺幾高級。當中嘅薯蓉都好有牛油香味。鐵板一口牛粒好諗身，燒得好香，好香口，兩個人食啱啱好。另外都叫咗個鐵板帶子，每口帶子都充滿蒜蓉香味，好新鮮，調味都很好。之後就叫左我最愛嘅金菇肥牛卷，個燒汁好好味，牛肉都燒得啱啱好，配埋金菇就減低左個油膩感。主菜我哋叫咗原條蒲燒鰻魚飯，鰻魚足足有上手臂咁長，亦都好厚身，燒汁都好濃郁，價錢$108，個性價比比其他餐廳都算係高，再配埋一個麵豉湯，不過個湯就比較普通。芝士海鮮鍋，成個面都鋪滿芝士，好濃稠。裏面有青口，魷魚圈，蟹柳，椰菜，金菇......每口都充滿芝士香味，不過食多幾啖，就真係有點濟，但就真係好好味。炸物方面我哋叫咗鮮蝦天婦羅，隻蝦好新鮮，彈牙，我朋友食埋個蝦頭都唔覺得苦啊。最後我哋兩個人埋單＄504，日本料理來說食到咁嘅水準都唔算好貴，因為我哋都真係叫咗好多嘢食。