Green Impression Tea Bar (利奧坊) (Closed)

上網呢睇到呢間餐廳嘅食評，見到有賣生酮嘅食物。因為自己食開低碳，所以去朝聖一下。餐廳座落於大角咀舊區之中嘅豪宅地段，人流比較少。環境都舒適，唔太多人，可以靜靜地坐低傾計食嘢。叫咗一杯有機洋甘菊草本茶，無糖嘅，味道正常。另外一杯係凍菠蘿血橙水果茶， 呢杯勁奇怪，一飲係覺得好似橙樹止咳化痰嗰隻味。菠菜湯，味道正常，夠鹹味，都夠滑。 鮮茄蓉意大利肉丸配青瓜絲意粉見到呢個青瓜絲意大利粉，以為會用青瓜絲代替意大利粉。點知中伏，係真係意粉，上面有啲青瓜絲。唔知係咪我自己一廂情願，但係我望幅圖見到佢啲粉係青瓜絲。我冇同餐廳員工詢問清楚，唯有硬食。肉丸質地正常，亦都夠味。不過呢碟餸一送上枱就聞到少少臭味唔知係咪芝士嘅臭味，總之好似臭餿咗咁，不過食落又冇事。豬扒配雜菜呢個豬扒非常好味，咬落去好冧，夠濃味。雜菜好新鮮，唔同顏色，色彩繽紛，望見都好開胃。整體來說，味道都可以，服務都幾好。我叫侍應比杯滾水我。佢畀咗杯滾水加咗啲冰，可能怕我飲杯水太熱。但係知道我沖中藥之後，又好樂意幫我換返個杯純滾水。服務態度良好。環境好舒服，坐多陣都冇問題。